ქართული მოცვის ექსპორტი: როგორ აკავშირებს GBGA საერთაშორისო მყიდველებს მწარმოებლებთან

პროდუქტის სპეციფიკაცია

GBGA-ს საექსპორტო შეთავაზებაში წარმოდგენილია ისეთი ჯიშები, როგორებიცაა Suziblue, Blue Ribbon, Duke, Legacy, Bluegold, Bluecrop, O'Neal და Star.

მყიდველს შეუძლია მოთხოვნაში სასურველი ზომაც განსაზღვროს. მითითებული კატეგორიებია 12 მმ და მეტი, 18 მმ და მეტი ჯამბო და 22 მმ და მეტი სუპერ ჯამბო.

შეფუთვის ვარიანტები მოიცავს 3-კილოგრამიან საბითუმო შეფუთვას და 125, 200, 230 და 500-გრამიან კონტეინერებს.

ფორმაში შესაძლებელია სერტიფიცირების მოთხოვნების მითითებაც, მათ შორის GlobalG.A.P., GRASP და SPRING.

კონკრეტული ჯიშის, ზომის, შეფუთვისა და მოთხოვნილი სერტიფიკაციის ხელმისაწვდომობა შესაბამის ექსპორტიორთან ზუსტდება.

მოსავლის პერიოდი და მიწოდების მოცულობა

ქართული მოცვის ძირითადი მოსავლის პერიოდი წლის მე-20 კვირიდან 30-ე კვირამდე გრძელდება.

ეს დაახლოებით მაისის შუა რიცხვებიდან ივლისის ბოლომდე პერიოდს მოიცავს, თუმცა კონკრეტული ჯიშისა და მწარმოებლის ხელმისაწვდომობა შესაბამისი მიწოდების კვირისთვის ცალკე დასტურდება.

Export Hub-ის მიხედვით, საექსპორტო მოთხოვნა შეიძლება ერთი კონტეინერიდან დაიწყოს. ერთი კონტეინერის მოცულობა 15 ტონამდეა განსაზღვრული.

მყიდველი მოთხოვნის ეტაპზე უთითებს სასურველ მოცულობას, მიწოდების კვირას, დანიშნულების ბაზარს, ჯიშს, ზომას, შეფუთვას, სერტიფიცირების მოთხოვნებსა და გადახდის პირობებს.

როგორ მუშაობს Export Hub

Export Hub პირდაპირი ონლაინ გაყიდვების პლატფორმა არ არის. მისი ფუნქცია მყიდველის საწყისი მოთხოვნის ერთ ფორმატში გაერთიანება და ასოციაციის ექსპორტიორ წევრებთან დაკავშირებაა.

ფორმის შევსების შემდეგ GBGA მოთხოვნას ამუშავებს და ექსპორტიორ წევრებს გადასცემს.

ასოციაციის მიერ მითითებული დამუშავების ვადა 3-დან 5 სამუშაო დღემდეა.

შემდგომი კომერციული პირობები, პროდუქტის ხელმისაწვდომობა, საბოლოო სპეციფიკაცია და მიწოდების დეტალები უშუალოდ შესაბამის ექსპორტიორთან ზუსტდება.