Whisperr: ავტონომიური AI პლატფორმა მომხმარებლის შენარჩუნებისთვის

როგორ განსხვავდება ტრადიციული ავტომატიზაციისგან

მარკეტინგის ავტომატიზაციის პლატფორმები კომპანიებს სეგმენტების შექმნის, კამპანიების დაგეგმვისა და სხვადასხვა არხით კომუნიკაციის საშუალებას აძლევს. თუმცა ასეთი პროცესების მართვა ხშირად კვლავ მოითხოვს ადამიანის ჩართულობას: გუნდმა უნდა განსაზღვროს პრობლემა, შეარჩიოს აუდიტორია, მოამზადოს კომუნიკაცია და გადაწყვიტოს, როდის და როგორ დაუკავშირდეს მომხმარებელს.

Whisperr-ის მოდელი განსხვავებულია. სისტემა მხოლოდ შესაძლო მოქმედებას არ სთავაზობს გუნდს. წინასწარ განსაზღვრული წესების ფარგლებში მას შეუძლია თავად გადაწყვიტოს, საჭიროა თუ არა კონკრეტულ მომხმარებელთან ჩარევა, როდის უნდა მოხდეს ეს, რომელი არხი გამოიყენოს და რა შეტყობინება გააგზავნოს.

ამისთვის Whisperr აკვირდება ისეთ სიგნალებს, როგორებიცაა სისტემაში შესვლის სიხშირე, ფუნქციების გამოყენება, აქტივობის შემცირება, მიტოვებული კალათები და ჩავარდნილი გადახდები.

თითოეული მოქმედების შემდეგ პლატფორმა მიღებულ შედეგსაც აანალიზებს და ამ ინფორმაციას მომდევნო გადაწყვეტილებებში იყენებს.

ვინ ადგენს წესებს

ავტონომიური მუშაობის საზღვრებს თავად ბიზნესი განსაზღვრავს.

კომპანია ადგენს მიზნებს, ბრენდის ტონს, დაშვებულ და აკრძალულ ფორმულირებებს, საკომუნიკაციო არხებს, შეტყობინებების სიხშირეს, არასაკომუნიკაციო საათებს, შეთავაზებების ლიმიტებსა და იურიდიულ მოთხოვნებს.

Whisperr ამ ჩარჩოს ფარგლებში მოქმედებს.

კომპანიას ნებისმიერ დროს შეუძლია სისტემა შეაჩეროს, კონკრეტული სტრატეგია გამორთოს, ლიმიტები შეცვალოს ან შედეგებს გადახედოს. საწყის ეტაპზე შესაძლებელია თითოეული შეტყობინების გაგზავნამდე მისი ხელით დამტკიცებაც.

„ჩვენ არ გვჯერა შეუზღუდავი ავტონომიის“, ამბობს Whisperr-ის დამფუძნებელი ირაკლი ელიაშვილი. „AI-ის ავტონომია იქ მთავრდება, სადაც კომპანიის სტრატეგიული, ეთიკური, იურიდიული და ბრენდული პასუხისმგებლობა იწყება.“

როგორ ხდება ინტეგრაცია

ინტეგრაცია პროდუქტის შესახებ საწყისი ინფორმაციის მიწოდებით იწყება. კომპანია Whisperr-ს აცნობს საკუთარ პროდუქტს, მომხმარებლების ტიპებს, ბრენდის საკომუნიკაციო სტილს, მომხმარებლის გადინებასთან დაკავშირებულ სიგნალებსა და მოქმედების წესებს.

შემდეგ პლატფორმა პროდუქტს SDK-ის ან API-ის საშუალებით უკავშირდება.

კომპანიის ინფორმაციით, სისტემა მიწოდებულ ბიზნესკონტექსტს თავად ამუშავებს და ინტეგრაციის პროცესის ნაწილს ავტომატურად ასრულებს.

ინტეგრაციის შემდეგ Whisperr რეალურ დროში იღებს ქცევით მონაცემებს და მათ საფუძველზე აფასებს, საჭიროა თუ არა კონკრეტულ მომხმარებელთან ჩარევა.